الهادي الجويني في قبرو

الجِنرَالِ الدّكتاتُورْ
وِالشّعْبِ التونسي المقهورْ
حْكايه حكِـيتْها لْحَفَّـارْ قَبْرِي
هْرَبْ بالفَـاسْ، وْزَادِ بْصَبرِي

فِي السّابِعْ من نوفَمبر
بِينِ أُكتوبر و ديسمبر
حَلِّ الزَّوَّالِي رَدْيُونُو
فَاحِ الْمِسْكْ و زَادِ الْعَنْبَرْ

النَّـاسِ الْكُـلْ سَمْعِتْ بَـيَـانُو
مِنْ جِيعَانُو و مِنْ عِرْيَـانُو
قَالُوا هذا صلاح الدّينْ
وإلاّ عُقْبَه فِي زَمَانُو

وِافْرَحْ يا فَلّاحْ يا عَامِلْ
أيَّـامِكْ بَاشْ تَحْلَا
وِانْتَ يا سَجينِ الرَّأيْ
أيَّـامِكْ رَايْ أحْلَى
وِافْرَحْ يا صَحافِي الْغَـلْبَه
صُوتِكْ رَاوْ بَاشْ يَـعْـلَا

هَـكَّه بِنْ عْلِـينَا قَالْ...ديمقراطية جنرال!

عِشرين سْنَـه راهُمْ عَدُّوا
وْمَا نْقُولِشْ كيفاش تْـعَدُّوا
حَلِّ الزَّوَّالِي عْوِينَاتُو
لْقَى الْبِيبَانِ الْكُلْ تْسَدُّوا

الجنرال سَخَّرْ حَيَاتُو
يِـبـْنـِي لِـينَا فِي حْبُوسَاتُو
عْلَى كُلْ مُواطِـنْ بُوليس
وِالْبوليس مْعَاهْ...زُلَّاطُو

وِافْرَحْ يا فَلّاحْ يا عَامِلْ
عَنْدِي ليكُمْ بُشْرَى
بِنْ عْلِيْ رَاهُو نَاوِي
يْزِيدْ مْعَاكُمْ عَشْرَه
وِيذَا ما عْجِبْكُمْشِ الْحَالْ
يْزِيدْ عْلِـيهُمْ...عَشْرَه

هَكَّه رَاجِلْ لَيْـلَى قال...جِنِرَالْ عَنْدُو خَيَالْ!